I kva stand må bustaden vere ved tilbakelevering?

Leigetakar pliktar å levere tilbake bustaden i avtalt stand. Viss de har avtalt noko særskilt om kva stand bustaden skal vere i ved tilbakelevering, står det gjerne i leigekontrakten. 

Viss ikkje anna er avtalt, må leigetakar tilbakelevere bustaden rydda, reingjort og i same stand som ved overtakinga. Leigetakar har likevel ikkje ansvar for manglar som har kome av normal slitasje, og dei manglar som utleigar sjølv pliktar å utbetre.

Ein bustad skal ved utflyttinga vere så rein at neste leigetakar skal kunne flytte rett inn utan ytterlegare vasking. At bustaden skal tilbakeleverast i same stand inneber også at leigetakar må rense sluk, skifte batteri i røykvarslarar, bytte lyspærer og reparere skadar som store skruehol og skraper. Viss det fulgte med møblar og anna inventar, skal desse også tilbakeleverast i same stand, sett bort fr det som kjem av vanleg bruk og slitasje. 

Sjølv om bustaden var mangelfullt reingjort ved innflytting, er leigetakar forplikta til å vaske. Viss leigetakar ved innflyttinga var misfornøgd med reingjeringa, skulle han då reklamert til utleigar innan rimeleg tid.

Etter tilbakelevering har leigetakar ikkje lenger tilgang til bustaden, og har dermed heller ikkje utbetringsrett. 

Utleigar kan på si side ikkje krevje erstatning for slitasje eller skadar som allereie var der ved innflytting.