Viessoláigonággolávdegoddi

Viessoláigonággolávdegoddi (VNL) lea stáhta doaibma mii viessoláigolága vuođul meannuda nákkuid mat čuožžilit láigolačča ja láigoheaddji gaskka viesu láigoheami dáfus. Min áššejođiheddjiin lea sierragelbbolašvuohta viessoláigorievtti suorggis. Mii meannudit áššiid Viessoláigonággolávdegotti láhkaásahusa njuolggadusaid vuođul.

Áššit gusket earret eará viessoláigovealgái, buhtadussii, eretcealkimii, depositummii ja viesu váilevašvuođaide. Mii čoavdit áššiid soabadallama dehe čálalaš mearrádusa bokte.

VNL čađaha čálalaš áššemeannudeami. Váidda, váidaga vástádus ja liigedokumeanttat galget leat čállojuvvon dárogillii. Digitála váidda-, vástádus- ja liigediehtoskoviid gávnnat min ruovttusiiddus dáppe «Kontakt oss».

VNL fállá soabaheami áššiin maid mii oaivvildit heivejit čovdojuvvot nu. Soabaheamis oažžu láigoheaddji ja láigolaš veahki neutrála soabaheaddjis gávdnat áššái čovdosa. Jus áššeoasálaččat soabadeaba soabaheamis, de čállit mii geatnegahtti šiehtadusa. Dat šiehtadus gohčoduvvo soahpamuššan.

Jus ášši ii čovdojuvvo soabaheamis, mearrida VNL ášši mearrádusain. Mearrádus lea geatnegahtti jus ii goabbáge áššeoasálaš vuojit ášši diggeriektái.

Sámegielagiin lea riekti gulahallat VNL:in sámegillii. Dat mearkkaša earret eará ahte sámegielagiin lea riekti sáddet váidaga, váidaga vástádusa, proseassačállosa ja eará čálalaš oktavuođaváldimiid sámegillii.

VNL galgá fuolahit dárbbašlaš jorgalemiid ja fállat dulkabálvalusaid sámegielagiidda go leat áššeoasálaščoahkkimat dehe soabahančoahkkimat. VNL máksá dulkagoluid dehe jorgalemiid sámegielas dárogillii ja dárogielas sámegillii.

VNL lea bealátkeahtes orgána, ja buot áššit mat devdet meannudeami eavttuid árvvoštallojuvvot objektiivvalaččat. Danne go mii leat bealátkeahtes orgána, de mii eat sáhte addit juridihkalaš ráđiid. Jus dárbbašat juridihkalaš veahki, de gávnnat dieđuid dan birra dáppe.

Min ruovttusiida lea jorgaluvvon eŋgelasgillii. Doppe gávnnat buriid dieđuid vuoigatvuođaid ja geatnegasvuođaid birra mat gusket viessoláigoláhkii. Jus válljet atnit Google Translate, Google vehkiin jorgalahttit min čállosiid, de leat don ieš ovddasvástideaddji dasa.

Jus dus leat gažaldagat dehe háliidat oktavuođa miiguin, de gávnnat oktavuođadieđuid dan birra dáppe «Kontakt oss».